Ibihugu bya Amerika na irani byemeranyije guhagarika intambar bidasubirwaho

intamba Minisitiri w’Intebe wa Pakistan, Shehbaz Sharif, yavuze ko ibihugu byombi bya Leta Zunze Ubumwe za Amerika na Iran byemeje amasezerano yo guhagarika intambara. Pakistan ikora nk’igihugu cy’umuhuza hagati y’izi mpande zombi.

Yabitangaje mu ijoro ryo ku wa 14 Kamena 2026. Ni nyuma y’uko abayobozi ba Amerika na Pakistan batangaje ko bagiye gushyira umukono ku masezerano yo guhagarika intambara na Iran. Iran yari itaragaragaza neza niba izayasinya kubera ko muri icyo gihugu bakomeje kuyamagana.

Minisitiri Shehbaz Sharif yavuze ko nyuma y’ibiganiro bikomeye byahuje impande zombi, ibihugu byemeje umushinga w’amasezerano yo guhagarika intambara. Ati: “Impande zombi zemeje guhita zihagarika ibikorwa bya gisirikare mu buryo bwa burundu harimo no guhagarika imirwano muri Liban.”

Yavuze ko umuhango nyir’izina wo gusinya amasezerano uzaba ku wa Gatanu tariki ya 19 Kamena mu Busuwisi. Minisitiri Shehbaz Sharif yashimiye Amerika na Iran ku kuba byiyemeje gushaka igisubizo gihagarika intambara hisunzwe uburyo bwa dipolomasi.

Yashimiye kandi ibihugu byabafashije mu kunga Washington na Tehran. By’umwihariko yagarutse ku ngufu Qatar yashyizemo kugira ngo ibihugu byombi byumvikane. Ati: “Ndashimira kandi ubuyobozi bureba kure bwa Arabie Saoudite na Turikiya ku musanzu ukomeye byatanze muri iki kibazo.”

Minisitiri w’Intebe wa Pakistan yavuze ko ibihugu biri guhuza Amerika na Iran bizafasha mu biganiro bitandukanye bizaba muri iki cyumweru. Harimo ibya tekiniki bibanziriza ishyirwa mu bikorwa ry’amasezerano.

Perezida wa Amerika, Donald Trump, yemeje aya makuru yatanzwe na Pakistan. Yavuze ko Amerika na Iran byemeje amasezerano yo guhagarika intambara. Ati: “Umushinga twagiranye na Iran ubu warangiye. Ubu nemeje ko umuhora wa Hormuz ufungurwa, bikajyana no kwemeza ko ingabo za Amerika zirwanira mu mazi zari zarakumiriye ubwato bwa Iran zikurwaho.”

Intambara yatangiye ku wa 28 Gashyantare ubwo Amerika na Israel zagabye ibitero kuri Iran. Byahitanye abayobozi bayo barimo na Ali Khamenei wari Umuyobozi w’Ikirenga. Iran yahise yihimura ifunga inzira ya Hormuz inyuzwamo hafi 20% by’ibikomoka kuri peteroli byo ku Isi. Amerika na yo yahise ikumira ubwato bwikoreye peteroli biva cyangwa bijya ku byambu bya Iran, bituma ubukungu bw’Isi buzahazwa kandi ibiciro bya peteroli bigera ku Madolari 130.

Ibihugu nka Qatar n’u Bwongereza byashimye impande zombi zemeje amasezerano, kandi biteganyijwe ko Visi Perezida wa Amerika, JD Vance, azerekeza i Genève mu Busuwisi gusinya aya masezerano.